Diabetes

Har du diabetes er det tilrådd at du etterkvart får jamnleg oppfølgjing hos augelege. Det er nyttig for augelegen å ha bakgrunnsinformasjon om helsetilstanden din, og det er dermed ønskjeleg at tilvising til augelege på grunn av diabetes som hovudregel går via fastlegen. Men viss vi ved undersøking og fotografering av augebotnen finn noko som tyder på diabetesproblem i auga dine kan vi sjølvsagt tilvise deg til augelege for vidare oppfølgjing.

Viss blodsukkeret er veldig høgt kan ein oppleve endring eller svingingar i synet på grunn av svelling i linsa i auget. Dette kan gi styrkeendring slik at auga framstår som (meir) nærsynte. Slike styrkeendringar vil gå tilbake når blodsukkeret blir regulert.

Ved diabetes ser ein særleg etter endringar i blodkara i netthinna, eller det som ein kallar diabetes retinopati. Undersøking med mikroskop, bilder og skan er vanleg for å avdekke om der kan vere problem.

Har du spørsmål om syn og diabetes? Ta gjerne kontakt med oss!